Visit Basel

Öffentl. Samstagsführung

Nächste öffentliche Führung

Nächster öffentlicher Kurs

Nächstes öffentliches Event

Gaignet für: 20 bis 60 Personen

Programmvorschlag: Basler Rivalideet

S zwaidailige Programm «Basler Rivalideet» fiert Eich dur d Basler Altstadt, wo Eich en Apéro erwartet.
 
1. Programmdail: Rundgang dur d Altstadt
 
Eierer Visit Basel Stadtfierer erwartet Eich vor em Roothuus und daucht mit Eich in die baide Altstedt voo Basel yy under em Titel «Glaibasel vs. Groossbasel».
 
Niemools isch e Bebbi aifach nur e Bebbi. Au under Beruggsichtigung vom gmainsaame Fieber fir dr groosssartigscht Fuessballclub, dr FCB, mit all syne Heehene und Diefene; und under Beruggsichtigung vom vyyl z bschaidene Stolz von ere Baslerin und emne Basler uff iiri ainzigartigi Kulturlandschaft doo am Rhyknei. Doo luegt me als erschts emool druff, voo wellem Uufer voo dr Stadt men aigedlig kunnt! Guet vrsteggt vor Ortskundige, effnet sich mitte in Basel e glaini aber fyyni Kluft zwische de Burger voo dääre Stadt: dr «Läggerligraabe» Rhy!
 
Uff dr ainte Uufersyte vom Babbe Rhy glääge, erstreggt sich s Groossbasel mächtig und majesteedisch vom Minschterhiigel in die verwinggleti Daalstadt und die moolerische Vorstedt: Doo isch under em Basler Bischof s mittelalterlige Basel entstande. Doo hän die mächtige Zinft im 13nte Joorhundert sich erhoobe und dr Handel bschtimmt, wo Groossbaasel ryych und beriemt wärde loo het. Doo isch me gärn fiirnääm, under sich und per Sii. Doo dringgt men Unser Bier und fiert mit däm Bier sym Logo en alt Bruuchtum wyter, well doo dr Lällekeenig em Glaibasler ganz sälbschtvrständlig d Zungen uuse streggt (au wenn dr Lällekeenig, entgäge dr Volggsmainig, jo aigedlig e ganz en anderi Funggzion het.)
 
Gägeniber im «Mindere Basel», loot me sich dur wenig beyydrugge, dringgt wyterhii s Ueli-Bier und wändet bim Danz voo den Eerezaiche de Fiirnääme vom anderen Uufer gärn dr Rugge zue. Me pfläggt halt die aigene Traditione und daas, obschoo s Glaibasel aigedlig erscht syter 1225 uff em Riisbrätt vom Basler Bischof Heini voo Thun als befeschtigte Bruggekopf fir sy Rhyibergang plaant und drnoo mit aifach Lüt voo dr nechere und dr wytere Umgääbig besiidlet worden isch. Fäldarbaiter, Räbbuure und Müller, Jeeger, Fischer und Holzarbaiter sin in Schaare hintr die digge Muure zoogen und hän sich de jensytige Machthaber unterstellt. Drotzdäm hän sii iiri Aigehaite bewaart und pflääge die bis hit.
 
Beglaitet unseri Kultuurhistoriker uff däm vrgnieglige Rundgang dur die zwai Syte voo dr Basler Seel und spiiret dr glai, fyyn Unterschiid in dr Stadt am «Läggerligraabe».
 
Eiri Fierig ändet im Brauereilokal Linde, wo Iir zem ene Apéro erwartet wärdet.
 
2. Programmdail: Apéro
 
In dr Linde, wo fir iiri seer gueti, boodeständigi Kuchi bekannt isch, wärdet Iir zem Apéro erwartet. Uff Wuntsch wird fir Eich sogar dää Disch yydeggt, wo sich e Zapfhaan in dr Mitti befindet, drmit Iir sälbschtändig fir flissige Nooschuub sorge kennet.
 
Kredänzt wird Eich dr ideaal Apéro zem Bier! Mir mechte nit behauptet haa, ass me noonem Apéro nyt mee ässe wurd, aber en ordedlig Beedeli isch allimool gleggt.
 
Ganz bsunders an däm Apéro: Die ainzelne Keschtligkaite wärde nit uff ere Platte uffdrait, sondern in emne «Schiifeli» wunderscheen presentiert – Jo! Iir lääset richtig, im ene «Schiifeli» Im groosse Kanton wurd me drzue «Kehrschaufel» saage. Nadierlig blitzblanggs Aluminium! Uff däm «Schiifeli» het s:

Feyni Bierrettich-Rosette
 
frisch gschnitteni Ueli-Bierwurscht – s Original
 
Rose vom Tête de Moine
 
Gwiirzguggummerefächer
 
frisch gschnitteni und gsalzeni Domaatespalte
 
ryffe Bärgkääs
 
saftige Rauchspägg
 
und huusgmachti, glaini Frikadelle mit Ziibeli und frischem Peterli

Yygschlosseni Laischtige

• En anderthalbstindige Rundgang «Glaibasel vs. Groossbasel» mit Eirem Visit Basel Stadtfierer
• Dr Apéro in dr Linde, wien är oobe beschriiben isch
• Koschte fir d Organisation, Uffdraagsabwigglig und die professionelli Durefierig voo Eirem Bummel
• Gsetzligi Meewärtstyr

Nit yygschlosse

• Gedrängg

Richtbryys (Phägglispeziaaltarif)
 

Richtbryys bi 40 Persone: CHF 36.00*

 
Richtbryys bi 35 Persone: CHF 38.00* 

Richtbryys bi 30 Persone: CHF 40.00*
Richtbryys bi 25 Persone: CHF 43.00*
Richtbryys bi 20 Persone: CHF 46.00*
 
Dr Richtbryys vrstoot sich pro Person und findet bi Durefierig an aim vo de Bummelsunntige Aawändig. Vrlanget e detaillierti Offärte, wo genau uff Eiri Wintsch und Bedirfnis aapasst isch!
 
Startzyt
 
D’Startzyt wählet Ihr sälber! Gärn veriibare mir dä mit Eich nach Absprooch.
 
Dräffphunggt
 
Vor em Roothuus
 
Ändphunggt
 
Linde in dr Rhygass
 
Minimali und maximali Dailnämmerzaal
 
Zur Duurefiehrig voo däm Programm git s e minimali und e maximali Dailnämmerzaal:
 
Minimali Dailnämmerzaal pro Gruppe: 20 Persone
Maximali Dailnämmerzaal pro Gruppe: 40 Persone 

Maximal sin bis 2 paralleli Grippli respektive Gruppe meeglig (= 60 Persone).
 
Bi mehrere parallele Gruppe isch bi de obe ufgfiehrte Richtbryyse (Phägglispeziaaltarif) die jewiiligi Gruppengreessi massgäblig (z.B. bi 60 Persone: 2 x Richtbryysstufe «bi 30 Persone …»).
 
Optioone / Änderige
 
Daas Programm vrstoot sich als Ydee! Unseri Spezialischte kenne Eich ainzelni Moduul abändere oder aapasse, es kaa wäggloo oder erwyteret wärde. Nadierlig sin au Änderige bym Ässe und Dringge meeglig.
 
Vrfiegbarkait
 
Daas Programm git s nur an de Bummelsunntige.
 
Bitte beachtet, ass d Vrfiegbarkait vor allem was d Riimligkaite bedrifft stargg yygschränggt isch! D Noofroog isch halt maischtens greesser als s Aagibot. Mir empfääle uss däm Grund unbedingt e meegligscht friezytigi Buechig!